أبسط و أضمن تعديل لزيادة السرعة و التسارع (تخسيس العربية)

- طبعا أى حد تصفح المنتدى وقرإ مواضيعه هيبقى عارف تقريبا معظم التعديلات اللى ممكن تتعمل فى عربية علشان تخليها أسرع.
لكن أهم و أبسط تعديل محدش أتكلم عليه وهو تخفيف وزن العربية.

- موتور العربية هو قلبها مينفعش تمشى من غيره لاكن موتور 500 حصان من غير عربية مش هيتحرك من مكانه.

- لكن كل لما العربية وزنها بقى أخف كل لما الموتور قدر يوصل بالعربية لسرعات أعلى ويطلع بالعربية بشكل أسرع زى الفرق بين موتوسيكل هوندا 65 حصان وفيرنا 110 حصان مع ان موتور الفيرنا أقوى لكنها أتقل من الموتوسيكل براكبه مرتين على الأقل ونتيجة الجرى بينهما معروفة.

كلمتين فيزياء ملهمش لازمة: الوزن بالنسبة للقوة power to weight ratio وهى النسبة بين قوة السيارة على وزنها, يعنى كل كيلو من وزن العربية ليه كام حصان من أحصنة الموتور الفيرنا كمثال موتورها 110ووزنها حوالى 1000 كيلو بالقائد النسبة ستكون110/1000 وستساوى0.11 يعنى كل كيلو من ال1000 ليه 0.11 حصان.

- أما الموتوسيكل السابق ذكره فبفرض وزنه بقائده 300 كيلو تكون النسبة 0.22 يعنى ضعف النسبة السابقة.
ولذلك أذا أردنا نظريا أن نزيد من سرعة الفيرنا لتساوى سرعة الموتوسيكل علينا أن نجعل النسبتين موتساويتين أما عن طريق تخفيض وزن الفيرنا أو زيادة قوة محركها.

- كل ذلك نظريا وعلى الورق نظرا لعدم الأخذ بعزم الموتوسيكل والسيارة ونسب تروس ناقل السرعة ومقاومة الهواء لكلا منهما الخ الخ الخ.

- من الأخر لو جبنا عربيتين وزن واحدة 1000 كيلو وموتورها 100 حصان ووزن التانية 2000 وموتورها 200 حصان فالأثنين هيكونوا متساويين فى السرعة القصوى والتسارع نظرا لتساوى النسبة فأذا أراد أحدهما أن يسبق الأخر فعليه بتقليل وزن سيارته حتى ترتفع النسبة وتزداد سرعة السيارة القصوى بدون العبث بأداء السيارة.

- طرق عمل ريجيم للسيارة:-

1- نزع العجلة الأضافية والكوريك وكل مستلزماته.(عمرك شفت عربية فورميلا 1 فيها كوريك وسبير تاير)

2- نزع الكنبة الخلفية والكرسي المجاور للسائق ودى أى حد ممكن يعملها أو حتى سروجى.

3- نزع السجاد الموجود بالسيارة و جميع أنواع البلاستيك الغير ضرورية زى ال panels الموجودة على الأبواب بالأضافة للخشبة اللى كان السبير تاير محطوط تحتها.

4- نزع جميع وسائل الترفيه الموجودة بالسيارة زى السماعات و التسجيل و الزجاج الكهربا ومستلزماته والشاشات وهكذا (وأبقى أديهالى)

5- نزع التكيف بمستلزماته.

6- تبديل الكبوت الأصلى بأخر من الكاربون فايبر خفيف جدا وسعره مش غالى حوالى 2000 حتى 3000 جنيه بس مع تغيير الرفارف الحديد بأخرى فايبر والأبواب بالمرة

7- تغيير الجنوط بأخرى الومنيوم أخف فى الوزن.

8- نزع التابلوه بجميع مشتملاته مع شراء عدادات رياضية بدلا من الأصلية وطارة سبور.

9- نزع الزجاج الجانبى للسيارة.

10- أزالة كل مالا يمت للسيارة بصلة كالدباديب والمساحات و المفكات وأنت وخيالك.

11- عمل ريجيم للسائق نفسه وأنا مبهزرش, فى سباقات الفورميلا العربية بتبقى خفيفة جدا لدرجة أن فرق 5 كيلو وزن زيادة ممكن يكسب عربية ويخسر التانية وأهى صحة برضه.

- ولو التعديلات دى حد هنا كان مجنون كفايه وعملها هتديله تخفيض فى الوزن مش أقل من 400 كيلو وشوفوا دول فى عربية خفيفة وأساسا قوية زى الفيرنا ممكن يعملوا أيه.

- طبعا مفيش حد هيجيب عربيته ويخلع الكاسيت والسماعات والكنبة بتاعتها بس ممكن أى حد يعمل تجربه بسيطة ويجيب تلاتة أصحابه و يركبهم معاه ويشوف الفرق فى السحب والسرعة القصوى وبعدين يروح يوصل كل واحد على بيته ويشوف السحب عامل أزاى.

ملاحظة: الموضوع اللى فوق ده للناس اللى بتعمل عربية سباق لكن مين فينا مفيش فى عربيته حاجات قد كده ملهاش أى لازمة وبتزود وزن العربية على الفاضى وخلاص.

- فوائد تخسيس السيارة:-

1- زيادة فى السرعة القصوى.

2- زيادة فى تسارع السيارة

3- التقليل من أستهلاك الوقود.

4- تحسن أداء السيارة فى المنحنيات على السرعات العالية.

5- معظم التعديلات "ببلاش" ومع ذلك ليها الفوائد السابقة.

أمثلة:-

كبوت كاربون فايبر.

تسلم اديك في انتظار المزيد

» الفطيم للسيارات تعتمد حلول شركة إم بي إس الخاصّة بالمعالجة الذكية وفائقة السرعة لطلاء السيارات
» Mitsubishi Lancer 2009 تعديل رياضي جداً.
» اخر موضه لغطاء العربية